ХҮИС, МУИС-ийн БС болон ХААИС-ийн ЭЗБС хамтарсан СПОРТЫН НӨХӨРСӨГ ТЭМЦЭЭН зохион байгуулагдан, амжилттай өндөрлөлөө.
ХҮИС, МУИС-ийн Бизнесийн сургууль, ХААИС-ийн Эдийн засаг бизнесийн сургуулийн хооронд 2018 оны 12 сарын 17 өдөр Шинжлэх ухаан, дээд боловсролын салбарт хамтран ажиллах санамж бичгийг байгуулсан юм. Энэхүү санамж бичгийн хүрээнд сургуулиудын тогтвортой хамтын ажиллагааг хөгжүүлэхэд чиглэсэн багш, ажиллагчдын чөлөөт цагийг зөв боловсон өнгөрөөх, спортын ур чадварыг дээшлүүлэх, туршлага солилцох, нөхөрсөг харилцааг бий болгох зорилгоор Спортын нөхөрсөг тэмцээнийг ХҮИС-ийн санаачлагаар МУИС-ийн БС болон ХААИС-ийн ЭЗБС хамтран зохион байгууллаа.
Спортын нөхөрсөг тэмцээнийг 11 сарын 15-16 өдрүүдэд ХҮИС дээр сагсан бөмбөг, волейбол, ширээний теннис, дартс, шатар зэрэг багийн болон ганцаарчилсан төрлүүдээр зохион байгуулагдан, давхардсан тоогоор тэмцээнд 100 гаруй эрдэмтэн багш нар, ажиллагчид хурд, хүч, цэц мэргэнээ сорилоо.
ХҮИС, МУИС-ийн Бизнесийн сургууль, ХААИС-ийн Эдийн засаг бизнесийн сургуулийн хоорондын хамтын ажиллагааг үндэсний түвшинд салбар дунд, нээлттэй, жишиг судалгааны төв байгуулах, судалгаа, инновацийн төсөл, хөтөлбөрийг санаачлан хэрэгжүүлэх, профессор багш нарыг харилцан урьж хичээл заалгах, туршлага солилцуулах замаар чадавхжуулах ажлуудыг хийхээр төлөвлөж байна.
